Үстүбүздөгү жылы 133 миң гектар аянтка чегиртке жайылып, эгин талааларын жалмап кетиши мүмкүн. Бул боюнча Өсүмдүктөрдү химиялаштыруу, коргоо жана карантин департаментинин жетекчисинин орун басары Алмаз Алакунов коңгуроо какты.
Ал «Биринчи радиодого» маек берип жатып, өлкөдө чегирткенин 50 түрү бар экенин жана алардын ичинен “италия” менен “марокко” аталышындагы түрлөрү көп төлдөп, өзгөчө коопту болоорун белгиледи.
“Чегирткенин жапырт каптоосу 8-12 жылда күч алып, басаңдап турат. Былтыртан бери жаңы толкуну башталды. Быйыл 133 миң гектар жерди чегиртке капташы мүмкүн”, — деди Алакунов.
Ал ошондой эле учурда Базар-Коргон, Ноокен, Сузак жана Араван райондорунун 4 100 гектар жеринде зыянкечтер аныкталып, аларга каршы тийиштүү иштер жасалып жатканын кошумчалады.
