Депутат Максатбек Сарбагышев бүгүн, 2-ноябрь күнкү Жогорку Кеңештин жалпы жыйынында саламаттыкты сактоо тармагындагы элдин канын соргон жагдайлар тууралуу маселе көтөрдү.
“Ооруканага жатып дарылануу суммасы 14 500 сомго көтөрүлүптүр, карапайым элге бул сумма оор. Мед.камсыздандыруу боюнча түшүндүрүү иштери жүргүзүлбөгөндүктөн, элдин түшүнүгү жок. Ооруканаларда дээрлик шарт жок, дары-дармекти элдин өзүнө саттырып алып жатасыңар”, — деди эл өкүлү.
Ошондой эле Сарбагышев ооруканада лифт иштебей комада жаткан бейтапты тепкичтен көтөрүп түшүрүлгөнүнө күбө болгонун айтты.
“Кечээ Нейрохирургия бөлүмүндө отурсам реанимациядан чыгарып операцияга киргизиш үчүн 2-кабаттан көтөрүп түшүштү. Ошол 10 мүнөттүн ичинде өлүп калса эмне болот”, — деди ал.
Белгилей кетсек, Жогорку Кеңеш “Дары каражаттарын жүгүртүү жөнүндө” мыйзам долбоорун экипчи окууда кароодо.
