Бүгүн, 4-марттагы Жогорку Кеңештин жыйынында бир катар социалдык-экономикалык маселелер көтөрүлдү.
Алсак, депутат Эрмамат Тагаев Ош жана Баткен облусунда чыгарылып жаткан цементтин баасы кымбат болуп жаткандыгы тууралуу жергиликтүү элдин кайрылуусуна токтолуп, Өкмөт өкүлүн аталган маселеге көңүл бурууга чакырды.
«Жергиликтүү цементтин тоннасы 71 АКШ доллары болуп жатыптыр. Ал эми Өзбекстандыкы 40 АКШ долларынын тегерегинде сатылып жаткан экен. Мындай эки эсеге жакын айырмачылык болбош керек эле», — деди депутат Эрмамат Тагаев.
Ал эми депутат Умбеталы Кыдыралиев Таш-Көмүр шаарындагы социалдык мекемелерди оңдоп-түзөө маселесин көтөрүп, анын ичинин оорукана, бала бакча имараттары жана маданий жайлар тууралуу сөз кылды.
Ал эми депутат Улан Примов Памир аймагынан Кыргызстанга көчүрүлүп келген мекендештерибиз үчүн быйылкы жылга акча каралбай калганын эске салып, аталган маселе чечилиши керектигин кошумчалады.
