Эртең 17-апрелден баштап «Манас» аэропортунун аймагында өлкөдөгү эпидемиологиялык абалга байланыштуу айрым чектөөлөр киргизилет. Бул тууралуу аэропорттун басма сөз кызматы билдирди.
Тактап айтканда, түнкү саат 00:00дөн эртең мененки саат 7:00гө чейин аэровокзалдын ичине бөтөн адамдардын, анын ичинде узатып жана тосуп алууга келген жарандардын кирүүсүнө тыюу салынат. Аэровокзалга авиабилети бар гана адамдар киргизилет.
Чет өлкөлөргө кетип жаткан жана учуп келген жарандардын дене табын өлчөө күчөтүлөт.
«Урматтуу авиакомпаниянын жүргүнчүлөрү, бул чектөө чаралары сиздердин коопсуздугуңуздар үчүн көрүлдү, биз сиздерди эрежелерди сактоого жана ден-соолугуңузга кам көрүүгө чакырабыз», — деп жазылат маалыматта.
Аэропорттун басма сөз кызматы бет тагынып, 1,5 метр социалдык аралыкты сактоону эскертет.
