Бүгүн, 6-апрелде Көмүр казуучу компаниялар менен түз иштешүүгө макул эместигин билдиришип, 30дай айдоочу “Кыргызкөмүр” мамлекеттик ишканасынын алдына чогулушту.
Алардын айтымы боюнча мамлекеттик тендерден уткан көмүр казуучу компаниялар, аны жеткирүүчү айдоочуларга арзан тариф менен ташытып жатышат. Андыктан алар компания менен эмес, “Кыргызкөмүр” менен түз келишим түзүп иштешүүнү талап кылышууда.Нааразы болгон айдоочуларга , ишкананын директору жолугуп сүйлөшүү жүргүздү. Жолугушууда ишкананын директору Канатбек Аширбаев Өкмөткө кат жөнөтүп, айдоочулар менен түз иштешүүнү, белгилүү бир тарифти коюп берүүнү өтүнгөнүн айтты. Ал эми бул жоопко канаатанбаган айдоочулар жыйын залынан чыгып кетишип, аталган маселе боюнча өлкө башчысына кайрыларын билдиришти.
