Казакстандын кайрадан шайланган президенти Касым-Жомарт Токаев салтанаттуу түрдө кызматына киришти.
Маалыматка ылайык, инаугурация аземи Астанадагы Эгемендүүлүк сарайында өтүүдө. Казакстандын Конституциясынын 42-беренесине ылайык, жаңы шайланган мамлекет башчысы ант берди.
Казакстандын шайланган президентинин инаугурациясынын урматына ант бергенден кийин мамлекеттик гимн аткарылып, Казакстандын Борбордук шайлоо комиссиясынын төрагасы Нурлан Абдиров Касым-Жомарт Токаевге Казакстандын президентинин күбөлүгүн тапшырды.
Эскерте кетсек, ушул жылдын 20-ноябрында Казакстанда кезексиз президенттик шайлоо өткөн. Анын жыйынтыгында Токаевге 6 млн 456 миң 393 шайлоочу добуш берген.