Кара-Балтада адам өлтүрүүгө шектелип бири-бирине тууган, мурда соттолгон үч адам кармалды. Бул тууралуу Чүй ОИИБ билдирди.
Окуя 22-мартта түнкү саат 01:00 чамасында болгон. Ал күнү бары бир үйдө чогулушкан. Үчөө Г. Э. менен уруша кетип, А.К. аны табарсык жагына бүктөлмө бычак менен бир нече жолу сайып, андан кийин белгисиз тарапка качып кетишкен.
Г. Э. аймактык оорукананын реанимация бөлүмүнө жаткырылып, бирок өзүнө келбей каза болуп калган. Бул Факт “Саламаттыкка оор зыян келтирүү” беренеси менен катталган.
“Кармалгандар убактылуу кармоочу жайга киргизилди. Тергөөнүн жүрүшүндө шектүүлөргө Кылмыш-жаза кодексинин 122-беренеси (“Адам өлтүрүү”) менен айып тагылып, райондук сот тергөө абагында калтыруу чечимин чыгарды”, — деп берилет маалыматта.
Кылмыш иши боюнча зарыл болгон бардык соттук-укуктук экспертизалар дайындалып, тергөө уланууда.
