Кара-Суу районунда сот аткаруучу опузалап пара алууга шектелип кармалды. Бул тууралуу ИИМден билдиришти.
Маалыматка ылайык, милицияга Кара-Суу районунун тургуну арыз менен кайрылган. Ал өзүнүн арызында 2023-жылдын 23-декабрынан тартып “С.” аттуу Кара-Суу районунун сот аткаруучусу КРнын чек арасынан өтүү үчүн чектөөнү алып берем деп опузалап, пара талап кылып жаткандыгын билдирген.
Аталган факты боюнча Кылмыш-жаза кодексинин 343-беренеси («Опузалап пара алуу») боюнча кылмыш иши козголгон.
Жүргүзүлгөн ыкчам-издөө иш-чараларынын натыйжасында Жогорку сотко караштуу Сот департаментинин Кара-Суу райондук САКБнүн сот аткаруучусу, юстициянын 3-класстагы кеңешчиси 1980-жылы туулган С.С. аттуу жаран 20 миң сом атайын белги коюлган акча каражатын алып жаткан жеринен кармалды.
Учурда тергөө амалдары жүргүзүлүүдө.
