Жүрөк хирургиясы жана органдарды алмаштыруу илим изилдөө институтуна ӨКМдин Өрттү көзөмөлдөө кызматы 2024-жылдын 26-мартында №00-03 текшерүү актысынын негизинде пландуу текшерүү жүргүзүп, 18 пункттан турган бузууларды четтетүү тууралуу эскертме жазуулар берилген.
Анын жыйынтыгында эскертме жазуулар толук кандуу аткарылбагандыктан “Укук бузуулар жөнүндө” кодексинин 143-беренесине таянып 230 көрсөткүч эсебинде 23 миң сом административдик айып салынган.
Мындан тышкары текшерүүнүн негизинде эки суу алуучу гидрант оңдоп-түзөөдөн өткөрүлүп, ишке киргизилген.
Эске салсак, кечээ, 11-февраль күнү кечинде аталган институттан өрт чыгып, операциядан кийин ооруканада жаткан 1 жаш 7 айлык наристе жана 16 жаштагы өспүрүм Кардиологиянын жандандыруу бөлүмүндө каза тапкан. Азыркы тапта бул окуя боюнча кылмыш иши козголду.
