Ысык-Көлдүн Өрнөк айылындагы жол кырсыгына кабылып, ооруканада оор абалда жаткан бала каза болду. Бул тууралуу Саламаттык сактоо министрлигинин Ысык-Көл облусу боюнча координатору Жибек Жайлымышова «Азаттыкка» билдирди.
17-июлдагы жол кырсыгына кабылган «Тойота Авенсис» унаасында бараткан алты киши каза болду.
Бул жол кырсыгында Кыргызстандын Бириккен Улуттар Уюмунун (БУУ) Нью-Йорк шаарындагы туруктуу өкүлү Аида Касымалиеванын ата-энеси (68 жашта) жана алардын тогуз жаштагы небереси (эгиздин түгөйү) ошол жерде каза тапкан.
Үч бала оор абалда ооруканага жеткирилип, ошол түнү 9 жаштагы эгиздин түгөйү, эртеси күнү 14 жаштагы өспүрүм каза болгон.
Милиция кырсык «Тойота» автоунаасы кайрылып жатканда «Мерседес-Бенц-210» машинеси сүзүп кеткенин, аны 20 жаштагы айдоочу башкарып баратканын билдирген.
«Мерседестеги» эки киши жараат алып, Ысык-Көл райондук ооруканасына жаткырылган.
