Нарында мыйзамсыз кийик аткандарга 640 миң сом айып салынды. Бул тууралуу жаратылышты коргоо багытында иш алып барган NABU Кыргызстан уюмунун маалымат кызматынан кабарлашты.
Кечээ, 28-августта Нарындагы Сөөк жайлоосунда жарандар мыйзамсыз аң уулоого чыгып, 2 тоо эчкисин атышкан.
Ат-Башы районунда эки кийик атылганы аныкталды. Аңчылардын бири этти жашыруу үчүн чатырдан чыгарып, дарыя жээгине ыргытып жиберген. Экинчи тургун этти короосуна сүрсүтүп илип койгон.
Жеринде акт түзүлүп, аңчылардын ар бирине 320 миң сомдон айып салынды. Ал эми эт райондук милиция бөлүмүнө өткөрүлүп берилди. Аталган факт боюнча тоо эчкисин аткан жарандарга 20 миң сомдон административдик айып салынып, 300 миң сомдон доо, жалпы 640 миң сомдук айып салынган.
