Мурдагы Чүй ОИИБнын башчысы, мамлекеттик стабилдүүлүктү сактоодо Кой-Таш окуясынан жапа чеккен генерал-майор Самат Курманкулов Москва шаарына Калыбына келтирүү борборуна дарыланганы кетти. Бул тууралуу депутат Жеңишбек Токторбаев фейсбук баракчасынан билдирди.
“Эсен-аман жетип, жакшы дарыланып келсин. Кудайым шыпаа берип, батыраак сакайып кетсин.
Ал эми колдоо көрсөткөн Тышкы иштер министри Жээнбек Молдокановичке, Кыргызстандын Россия федерациясындагы элчиси Гүлнара-Клара-Самат айымга жана «Манас» Эл аралык аэропортунун жетекчиси Манас Самудиновичке ыраазычылык билдирем. Ишиңиздерге ийгилик!”,- деп билдирүү калтырган.
Эскерте кетсек, 2019-жылдын 7-августунда Кой-Таш окуясында Чүй облустук ички иштер башкы башкармалыгынын башчысы Самат Курманкулов башынан жаракат алып, жандандыруу бөлүмүнө түшкөн. Ага эки жолу оор операция жасалган.
