Конституциялык комитет парламенттин төрагасынын орун басарлыгына эки талапкерди жактырды. Бул тууралуу бүгүн, 19-январда белгилүү болду.
Маалыматка ылайык, спикердин орун басарлыгына «Өнүгүү-Прогресс» фракциясы депутат Улан Исмаиловду, ал эми «Ата Мекен» фракциясы Нурбек Сыдыгалиевди көрсөттү.
Депутат Бакыт Төрөбаев («Өнүгүү-Прогресс») кесиптештеринен талапкерлерди кийинки жумада кароону суранды. Анын айтымында, Улан Исмаилов үй-бүлөлүк себептерден улам 2-3 күн жыйынга катыша албайт.
«Балким кийинки жумада талапкерлерди кароо боюнча парламентке сунуш киргизебиз”, — деди ал.
Комитеттин төрагасы Канат Керезбеков бул боюнча чечимди Жогорку Кеңеш өзү карай тургандыгын, Комитеттин компетенциясына белгилүү бир маселени кароо күнүн белгилөө кирбей тургандыгын айтты. Ал эми мүчөлөрү экинчи талапкердин келишин күтөрүн билдиришти.
