Президент Садыр Жапаров май айынан тарта электр энергиясы кымбаттай турганын айтты.
Ушул жылдын май айынан баштап электр энергиясына болгон тариф 0,77 тыйындан 1 сомго көтөрүлөт. Бул тууралуу өлкө башчы Садыр Жапаров социалдык тармактагы баракчасына жазды. Жапаров бааны жогорулатуу чечими өлкөдөгү энергетика тармагынын абалына байланыштуу экендигин белгилеген.
«Антпесек энергетика тармагыбызды биротоло жоготуп алуу коркунучу бар. Бүгүнкү күндө өзүбүздөн өндүрүлгөн электр энергиянын өздүк наркы Токтогулда чыккан жерден 21 тыйын болгону менен энергетиктердин эмгек акысы, эскилиги жеткен трансформаторлорду, зымдарды, мамычаларды алмаштыруулар кошулуп отуруп 1 кВт саат электр энергиянын өздүк баасы 2 сом 38 тыйынды түзөт», — деген Жапаров.