Кыргыз-казак чек арасындагы өткөрүү пункттары модернизацияланат. Бул тууралуу президент Садыр Жапаров бүгүн Бишкек шаарында Казакстан президенти Касым-Жомарт Токаев менен болгон сүйлөшүүлөрдүн жыйынтыгы боюнча жалпыга маалымдоо каражаттары үчүн билдирүүсүндө айтты. Президенттердин жолугушуусунда кыргыз-казак мамлекеттик чек арасындагы өткөрүү пункттарын модернизациялоо боюнча жол картасынын аткарылышы каралды. Анда 2003-жылдагы өткөрүү пункттары жөнүндө макулдашууга өзгөртүүлөрдү киргизүү протоколуна кол коюлду.
«Бул демилгелер ийгиликтүү ишке ашса, соода жүгүртүүлөрүбүз 2030-жылга чейин 3 миллиард АКШ долларына жетет деп ишенебиз.
Ошону менен бирге, транспорт жана коммуникациялар жаатындагы негизги долбоорлор жана аймактагы суу-энергетикалык ресурстарды рационалдуу пайдалануу маселелери боюнча пикир алмаштык», — деди Садыр Жапаров.
Казакстандын президенти Касым-Жомарт Токаевдин расмий сапарынын алкагында эки тараптуу бир катар жолугушуулар жана иш-чаралар өтүүдө.
