Министрлер кабинетинин төрагасынын орун басары Бакыт Төрөбаев Азербайжанга болгон жумушчу сапарында кыргыз тарап азербайжан спутниктеринин мүмкүнчүлүктөрүнө кызыгып, кызматташууга ынтызарлыгын билдирди. Бул тууралуу Азеркосмос агенттиги жазды.
Өкмөттүн маалымат кызматы Баку шаарында Кыргызстан менен Азербайжандын ортосундагы Экономикалык жана гуманитардык кызматташтык боюнча өкмөттөр аралык комиссиясынын 6-жыйыны өткөнүн кабарлады.
Кыргыз делегациясын Төрөбаев, ал эми Азербайжандын делегациясын аталган өлкөнүн премьер-министринин орун басары Самир Шарифов жетектеген.
Ишкер чөйрөлөрдүн ортосундагы байланыштарды активдештирүү, айыл чарба жана өнөр жай продукциясын түз жеткирүүлөрдү кеңейтүү боюнча макулдашуу болгон.
Биргелешкен долбоорлорду колдоонун негизги финансылык инструменти катары Азербайжан-Кыргызстан өнүктүрүү фондунун негизги ролу айтылды.
