Бүгүн агартуу министри Догдуркүл Кендирбаева Түрк дүйнөсүнүн муниципалдык бирлигинин башкы катчысы Фахри Солак менен жолукту. Бул тууралуу аталган министрликтен билдиришти.
Жолугушуунун жүрүшүндө тараптар билим берүү тармагындагы эки тараптуу кызматташтыкты өнүктүрүү маселелерин талкуулашты. Айрыкча жумушчу кесиптер боюнча адистерди даярдоо, өндүрүш менен айкалышкан билим берүү системасын өнүктүрүү жана билим берүү уюмдарынын ортосунда тажрыйба алмашуу маселелерине көңүл бурулду.
Кендирбаева Түркияда адистерди даярдоо системасы жакшы жолго коюлганын белгилеп, бул багытта кыргыз тарап тажрыйба алууга кызыкдар экенин айтты. Ошондой эле ал азыркы шартта билим берүү тармагындагы байланыштарды күчөтүү маанилүү экенин белгиледи.
Жолугушуунун жыйынтыгында тараптар жумушчу кесиптер багытында кызматташууну өнүктүрүү боюнча макулдашты.
