Кыргызстандын Коргоо министрлигинин Улуттук гвардиясынын параддык эсеби Россия жана Беларуста Совет элинин 1941-1945-жылдардагы Улуу Ата Мекендик согуштагы Жеңишинин 80 жылдыгына арналган аскердик парадга катышат.
Коргоо министрлигинен билдиришкендей, буга байланыштуу бүгүн аскерлер Россиянын Коргоо министрлигинин «Кант» авиациялык базасы аркылуу Москва жана Минск шаарларына жөнөп кетишти.
«Бул ардактуу милдет, алардын саптык даярдык деңгээлин эске алуу менен Улуттук гвардиянын аскер кызматчыларына, тактап айтканда Ардак кароол ротасына жүктөлгөн», — деп айтылат маалыматта.
Бул гвардиячылардын Кыргызстандан тышкары катышкан биринчи парады эмес. Улуттук гвардиянын Ардак кароол ротасы Пекиндеги, Москвадагы жана Минсктеги аскердик параддарга катышып, парад көрүүчүлөрүн суктандырып, параддын командачыларынан мыкты бааларды жана жоопторду алып, ар дайым мыкты саптык даярдык жана түздөнүү жактарынан өзгөчөлөнүп келген.
