1-сентябрдан тартып Кыргызстандагы 51 мектепте орусиялык 120 мугалим иштеп баштады.
Россиянын Агартуу министрлиги маалымдагандай, мугалимдер өлкөдөгү билим берүү мекемелерине «Россиялык мугалим чет өлкөдө» долбоорунун алкагында келишкен.
Россиянын агартуу министринин орун басары Денис Грибов Кыргызстандын билим берүү министри Каныбек Иманалиев менен жолуккан. Анда ал мугалимдер «Акылдын күчү» программасынын алкагында балдарга математика жана физика сабактарын терең үйрөтүү максатында кошумча сабактарды өтүшөрүн айткан.
Ошондой эле эки өлкөнүн агартуу тармагындагы кызматташтыгы мектеп менен эле чектелбестен орто кесиптик билим берүү жаатында да уланарын кошумчалаган.
Иманалиев Россиянын Кыргызстандын билим берүү тармагын өнүктүрүүгө кошкон салымы чоң экендигин айтып, өлкөдө россиялык тогуз мектеп куруларын белгилеген.
