Белгилүү сүрөтчү Иван Рясков «40 аял» аттуу социалдык-долбоорунун алкагында жаңы эмгегин сунуштады. Анда ак илбирстин жүнүн элестеткен кийим кийген кыздын образы тартылганын көрүүгө болот.
Автордун айтымында, бул чыгарма жөн гана искусство эмес — балдардын коопсуздугу, угуу мүмкүнчүлүгү чектелген жандар жана энелик мээрим тууралуу терең ойду камтыйт.
Сүрөт коомчулукта чоң кызыгуу жаратты. Андагы модель кыздын аты Салима. Ал кулагы укпаган үй-бүлөдө төрөлгөн. Алты айлык кезинде аны таежеси өз камкордугуна алып, узак аракеттердин натыйжасында, Кыргызстандын биринчи айымы Айгүл Жапарованын колдоосу менен Катар фондунун жардамы аркылуу кохлеардык имплант коюлган. Азыр Салима угуп, сүйлөй алат.
Иван Рясков бул идея Кыргызстандагы кыз балдардын коопсуздугуна байланыштуу окуялардан шыктануу менен жаралганын белгиледи.
«Бул сүрөттө мен кызды ак илбирстин баласына окшоштурдум — сейрек, назик жана коргоого муктаж. Ал эми анын энеси — кыздын тагдырын өзгөрткөн баатыр аял», — дейт ал.
Посмотреть эту публикацию в Instagram
