Өлкөдө жыл башынан бери кызамыкка кабылган балдардын саны 2 миңге жетти. Бул тууралуу Бишкек шаардык санитардык-эпидемиологиялык көзөмөл борборунун дарыгери Гүлзат Дикамбаева «Биринчи радиого» берген маегинде билдирди.
Бейтаптардын басымдуу бөлүгү Ош менен Бишкек шаарларында катталган.
«Көбү эмдөөдөн баш тарткан 1-5 жаштагы балдар. Кызамык менен ооруган балдардын 50 пайызы эмдөөдөн баш тарткан бишкектиктер, ал эми 30 пайызы 1 жашка чейинки эмдөөгө жашы жетпеген балдар», — дейт Дикамбаева.
Саламаттык сактоо министрлиги кызамыкты дарылоонун атайын жолу жоктугун, аны эмдөө менен гана алдын алууга мүмкүн экенин айтып келет.
Учурда Республикалык жугуштуу илдеттер ооруканасында 50дөн ашуун адам кызамыктан дарыланууда.
