Бүгүн, 24-апрелде Чүй ОИИБдин жетекчилиги №3 балдар ооруканасына барып, «Манас» аэропортуна бараткан жолдогу кырсыктан жабыркагандардан кабар алды. Бул тууралуу Чүй ОИИБден билдиришти.
Маалыматка ылайык, 21-апрелде жол кырсык боюнча кылмыш иши козголгон. Жол кырсыктын кесепетинен 27 окуучу ооруканага жеткирилип, үчөө үйүнө жөнөтүлгөн.
«Учурда 15 окуучу ооруканадан чыгарылган. Калгандары ооруканада, бир окуучу менен маршрутканын айдоочусу жандандыруу бөлүмүндө. Кылмыш иши боюнча бардык зарыл болгон соттук-укуктук экспертизалар дайындалып, тергөө амалдары жүргүзүлүүдө. Жабырлануучуларды жана мыйзамдуу өкүлдөрүн суракка алуу, айдоочулардын айдоочулук күбөлүктү алуунун мыйзамдуулугу, документтердин жана техникалык талаптарга ылайыктуулугу, унаалардын абалы текшерилип, такталууда. Тергөө иштери уланууда» — деп берилет билдирүүдө.
