Мээрим Жуманазарова Россияда өтө турган “Москванын гран-приси — Алроса кубогу” аталышындагы спорттук күрөш боюнча супертурнирге катышат. Бул тууралуу күрөш федерациясынан билдиришти.
Маалыматка ылайык, Жуманазарова 68 кг салмакта россиялык Ханум Велиевага каршы күрөшөт. Супертурнир 3-декабрда Москва шаарында өтөт.
Спортчулар Алроса кубогунун алкагында грек-рим, эркин күрөш жана грэпплинг боюнча да таймашышат.
Эскерте кетсек, Осло шаарында өткөн Дүйнө чемпионатынын жарым финалында Мээрим Жуманазарова Ханум Велиеваны жеңип финалга чыккан. Көп өтпөй россиялык машыктыруучулар бул беттеште калыстарды күнөөлөп, упай туура эмес көрсөтүлгөнүн айтып, нааразы болгон.
