Агартуу министрлиги мектептерге алты күндүк окуу жумасына өтүүгө уруксат берүү боюнча токтом долбоорун иштеп чыкты.
Учурдагы мыйзамдарда мектептер үчүн беш күндүк окуу жумасы каралган. Жаңы сунушта бул норма «беш күндүк жана/же алты күндүк окуу жумасы» деп өзгөртүлмөкчү.
Бирок кайсы мектептер жаңы тартипке өтөрү, чечимди ким кабыл алары жана ал милдеттүүбү же ыктыярдуубу деген маселелер азырынча так көрсөтүлгөн эмес. Ошондой эле токтом долбоорунда мектептердеги окуу сентябрь айында башталары гана жазылган. Буга чейин окуу жылы сөзсүз 1-сентябрда башталып келген.
Белгилей кетсек, өлкөдө өтө турган эл аралык иш-чараларга байланыштуу 2026–2027-окуу жылы 15-сентябрда башталат.
