Чүй облусунун Москва районунда 822 гектар жер тилкеси мамлекеттин балансына кайтарылды. Бул тууралуу УКМК кабарлады.
Жергиликтүү өз алдынча башкаруу органдарынын айрым жетекчилери жана кызматкерлери муниципалдык же мамлекеттик менчикке каттоого алып коюунун милдеттүү тартибин сактабастан, жерлерди жеңилдетилген баада ижарага беришкен. Жасалма ижара келишимин түзүү жолу менен аларды жеке кызыкчылыктарына пайдаланышкан.
Ошондой эле үлүштүк жерлерге мыйзамсыз ээлик кылуу фактылары аныкталган, алардын менчик ээлери ар кандай себептер менен Кыргызстандын чегинен чыгып кеткен же каза болгон.
Учурда аталган жерлерди каттоо иштери жүргүзүлүп, күнөөлүү адамдардын аракеттерине укуктук баа берүү боюнча зарыл чаралар көрүлүүдө.
