Кыргыз Республикасынын Курулуш, архитектура жана турак жай-коммуналдык чарба министри Нурдан Орунтаев «Кыргызстан аэропорттору» ААК башкармалыгынын төрагасы Манасбек Самидинов менен биргеликте «Манас» эл аралык аэропортунун жаңы аэровокзалынын курулушунун жүрүшүнө көчмө мониторинг жүргүздү. Бул тууралуу аталган министрликтин басма сөз кызматынан билдиришти.
Ага ылайык, жолугушуунун жүрүшүндө долбоорду ишке ашыруунун негизги этаптары, курулуш иштеринин темпи, ошондой эле сапатты камсыздоо жана мөөнөттөрдү сактоо менен байланышкан маселелер каралды.
«Заманбап аэровокзалдык комплекстин курулушун аяктоо 2026-жылдын жай айына пландаштырылган. Долбоор аяктагандан кийин «Манас» аэропорту бардык эл аралык стандарттарга ылайык келген жүргүнчүлөр үчүн мындан да ыңгайлуу жана функционалдуу болуп калат», — делет маалыматта.
Учурда оңдоо иштерине байланыштуу аэровокзалдын имаратына кирүү чектелген — жүргүнчүлөргө гана уруксат берилген. Ыңгайлуу тосуп алуу жана узатуу үчүн учуу жана келүү таблосу имараттын негизги кире беришинин алдында, көчөдө жайгашкан.
