Орусиялык оппозиячыл Навальный абактан ооруканага которулду. Бул тууралуу аталган өлкөнүн маалымат булактары жазып чыгышты.
Маалыматка ылайык, Алексей Навальный Владимир облусундагы №2 түзөтүү абагында жаза мөөнөтүн өтөп жаткан мезгилде ачкачылык жарыялаган. Көп өтпөй ал өзүнүн макулдугу менен витамин кабыл алганы маалым болду. Учурда анын ден соолугу канааттандырарлык экени айтылат.
Буга чейин абактагы дарыгерлер Навальныйдын ден соолугу оорлошуп, жүрөгү токтоп калуу коркунучу бар экенин айтышкан.
Белгилей кетсек, орусиялык оппозициячыл Алексей Навальный 17-январда Берлин шаарынан Москвадагы «Шереметьево» аэропортуна учуп келери менен кармалган. Андан соң анын камалышын сот мыйзамдуу деп тапкан. Көп өтпөй Алексей Навальныйга карата сот 3 жарым жылга эркинен ажыратуу чечимин чыгарган.