Бүгүн, 3-сентябрда Кара-Суу районундагы Нариман айылында турак үйдүн 2 кабаттуу сарайы 150 түк чөбү менен толук өрттөнүп кетти. Бул тууралуу ӨКМдин басма сөз кызматы билдирди.
Өрттүн жалыны ага жанаша жайгашкан экинчи турак үйдүн ашканасынын жана мончосунун чатырына өтүп күйгөн (жалпы аянты 20ч.м.). Өрттүн чогу ошол эле учурда дагы бир турак үйдүн короосунда жаткан 100 түк беде чөпкө чачырап, ал толугу менен күйүп кеткен.
Тилсиз жоо Ош облусунун Кара-Суу районундагы Нариман айылынын Ынтымак көчөсүндө орун алган.
Жерине жалпы 5 бөлүм тартылып, өрт саат 06:11де чектөөгө алынып, саат 07:32де толук өчүрүлгөн.
Маалыматка ылайык, өрттөн жабыркагандар жок. Учурда өрттүн келип чыгуу себеби жана материалдык чыгым эсептелүүдө.
