Ош облусунун Кара-Суу районунда талаадан 39 жаштагы аялдын өрттөлгөн сөөгү табылып, адам өлтүрүүгө шектелген эки жаран кармалды. Бул тууралуу Ош облустук ички иштер башкармалыгы билдирди.
Маалыматка ылайык, 10-июлда саат 05:30 чамасында Кара-Суу районундагы Ош – Аэропорт унаа жолунун боюндагы талаадан аялдын сөөгү табылган.
Аталган факт боюнча Кылмыш-жаза кодексинин «Адам өлтүрүү» беренеси менен кылмыш иши козголуп, тергөө амалдары жүрүп жатат.
Милициянын маалыматына ылайык, кылмышка шектүү катары 38 жана 34 жаштагы эки жаран кармалды. Учурда окуянын бардык жагдайлары такталууда.
