Ош шаарында 12 жаштагы окуучу бала кутурма оорусунан каза болду. Бул тууралуу шаардык санитардык-эпидемиологиялык көзөмөлдөө борбору журналисттерге тастыктады.
Маалыматка караганда, өспүрүм жайында Өзгөн районуна чоң энесиникине барганда ит тиштеп алган.
«Бала Ош шаарынын тургуну. Жайкы каникул учурунда бала чоң ата, чоң энесинин үйүндө болгон. Июль айынын аягында аны талаадан ит тиштеп алган. Бул боюнча дарыгерлерге кайрылышкан эмес. Чоң энеси тиштелген жерин спирт менен гана сүртүп койгон. Сентябрь айынын ортосунда өспүрүм жарыктан, суудан, катуу үндөн коркуп, гидрофобия пайда болгон. Клиникалык симптомдору бир жарым айдан кийин пайда болгон. Бирок кеч болуп калган”, — деп берилет маалыматта.
Белгилей кетсек, кутурма үй жана жапайы жаныбарлардын шилекейи аркылуу жугат.
