Ошто жарандардын телефондорун уурдоого шектелип 37 жаштагы жаран кармалды. Бул тууралуу Ош шаардык ички иштер башкармалыгынын басма сөз кызматы билдирди.

Билдирүүгө ылайык, телефон уурдоого шектелип Ош облусунун Өзгөн районунун тургуну, Ошто убактылуу жашап турган 1985-жылы туулган У.М. аттуу жаран кармалды.

Ал 13-май күнү Ош шаарында 28 жаштагы келиндин 13 миң 500 сомдук «Самсунг» үлгүсүндөгү телефонун уурдай качып, бирок изи сууй электе кармалган. Аны кармаган учурда жанынан жабырлануучунун телефонунан башка дагы 24 мобилдик телефондор табылган.

Шектүү бул телефондордун Ош жана Бишкек шаарларынан уурдаганын билдирип, моюнуна алган. Ал телефондорду Кыргызстандагы жарандарга сатуу өзү үчүн кооптуу экендигин эске алып, коӊшу өлкөгө сатууну ойлонуп жүргөн.

«Учурда шектүүнүн үстүнөн кылмыш кодексинин 209-беренесинин (алдамчылык) белгилери менен кылмыш иши козголуп, иликтөө иштери жүрүп жатат.  Кимде ким бул шектүүдөн жабыр тарткан болсо 102 же 0556-04-04-00 номерлери аркылуу байланышып коюшуӊуздарды суранабыз»,-деп берилет билдирүүдө.