Ошто маршруттук таксилердин айдоочулары жол кирени көтөрүүнү талап кылышууда. Бул тууралуу Ош шаардык мэриясынын чарба жана транспорт бөлүмүнүн башчысы Урал Раманов билдирди.
Анын айтымында, азыр бул маселе коомдук талкууда.
«Маршруттук таксилерде жол кирени 15 сомго чейин, муниципалдык транспортто 10 сомго чейин көтөрүү сунушталууда», — деди ал.
Эске сала кетсек, Бишкекте 1-ноябрдан тарта коомдук транспортто жүрүү тарифи көтөрүлдү. Мындай чечимди шаардык кеңештин депутаттары кабыл алышкан. Менчигинин түрүнө карабастан троллейбустарда жана автобустарда жол жүрүү 11 сом, маршруттук таксилерде 15 сом.
