Болгариядагы Dan Kolov-Nikola Petrov рейтингдик эл аралык мелдешинде Акжол Махмудов менен Жоламан Шаршенбеков финалга чыкты.
Спорттук иш-чара 2-5-март күндөрү София шаарында өтүүдө.
Махмудов грек-рим күрөшү боюнча 77 кг салмакта мелдештин 1/16 финалынан баштап катышууда. Ал чет өлкөлүк үч балбанды жеңип жарым финалга чыкты. Жарым финалда кыргыз балбаны норвегиялык спортчу менен килемге чыккан. Бирок кармаш башталганда норвегиялык балбан ыкма жасайм деп эс учун жоготуп койгон. Кармашты уланта албагандыктан жеңиш Махмудовго берилди.
Ал эми Жоламан Шаршенбеков 60 кг салмакта мелдештин 1/8 финалынан баштап күчүн сыноодо. Ал эки балбанды караандатпай жеңип, жарым финалда ирандын балбанды 10:2 эсебинде утуп алды.
Белгилей кетсек, мелдешке Кыргызстандын атынан төрт балбан аттанган.
