Садыр Жапаров бүгүн, 29-апрелде, Кыргыз-казак Өкмөттөр аралык кеңешинин 10-жыйынына катышуу үчүн Бишкекке келген Казакстандын премьер-министри Алихан Смаиловду кабыл алды. Бул тууралуу президенттин басма сөз кызматы билдирди.

Садыр Жапаров Алихан Смаилов менен учурашып, аны жогорку кызматка дайындалышы менен куттуктап, иштерине ийгиликтерди каалады.

“Биздин элдерибиздин бир туугандыгы, алардын тарыхый, маданий, рухий жалпылуулугу кыргыз тарабынан биздин эки тараптуу мамилелерди өнүктүрүүдө негизги фактор катары каралат”, деген ал, Кыргыз-казак Өкмөттөр аралык кеңешинин онунчу отуруму бир тууган мамлекеттерге ылайык ийгиликтүү жана конструктивдүү түрдө өттү деп ишеним артты.

“Биз достукка, өз ара ишенимге жана урматтоого негизделген кыргыз-казак мамилелерин жогору баалайбыз. Биздин эки тараптуу кызматташтыгыбыздын динамикасы абдан жогорку деңгээлде жана биз аны мындан ары да бекемдөө үчүн бардык күч-аракетибизди жумшоону максат кылабыз”, — деди Садыр Жапаров.

Садыр Жапаров Касым-Жомарт Токаевдин 26-майда Кыргызстанга күтүлүп жаткан расмий сапары кыргыз-казак көп кырдуу кызматташтыгына жаңы дем берерине ишеним билдирди.

Казакстандын Премьер-министри өз кезегинде Мамлекет башчыбызга Казакстан Республикасынын Президенти Касым-Жомарт Токаевдин чын жүрөктөн саламын жана жакшы каалоолорун жеткирип, Кыргызстан Казакстандын негизги саясий жана экономикалык өнөктөштөрүнүн бири экенин белгиледи. “Быйыл биздин дипломатиялык мамилелердин түзүлгөнүнө 30 жыл толот. Сиздин былтыркы Казакстанга болгон иш сапарыңыз эки тараптуу кызматташтыкты өнүктүрүүгө өбөлгө болду”, — деди Алихан Смаилов. Ошондой эле ал Өкмөттөр аралык кеңештин 10-отурумунун ийгиликтүү өткөндүгүнө токтолду.

Жолугушуунун жүрүшүндө Кыргызстан менен Казакстандын ортосундагы соода-экономикалык, суу-энергетика, маданий-гуманитардык жана эки тарапты кызыктырган башка тармактарда кызматташууну мындан ары кеңейтүү жана тереңдетүү боюнча пикир алмашуу болду.