Садыр Жапаров премьер-министрлик кызматын тапшырды. Бул тууралуу Президенттин аппарат жетекчиси Сүйүнбек Касмамбетов журналисттерге берген маалымат жыйында кабарлады.
Анын айтымында, кезексиз президенттик шайлоонун расмий жыйынтыгы чыкканда, Садыр Жапаров премьер-министрлик кызматынан кетип, азыркы өкмөт отставкага кеткен.
Жаңы курам куралып, ишке киргиче премьер-министрдин милдетин аткаруу биринчи вице-премьер Артем Новиковго жүктөлдү.
Өкмөттүн убактылуу милдетин аткаруучу мүчөлөрүнө жаңы өкмөт башчы шайланганга чейин өз милдеттерин аткаруу милдети жүктөлгөн.
Президент болуп шайланган Садыр Жапаровдун ант берүү аземи 28-январда өтөт. Аны уюштуруу боюнча комитет түзүлдү.
Жарлыкка президенттин милдетин аткаруучу Талант Мамытов кол койду.
Инаугурация аземи Бишкектеги Токтогул Сатылганов атындагы Кыргыз улуттук филармониясында өтөт.
