Бүгүн, 26-ноябрда Бишкекте Биринчи Элдик Курултай ишин улантууда. Курултайда президент Садыр Жапаров сунуштарды карап, суроолорго жооп берди.
«Саясатчылар эки түрдүү болот. Биринчи түрү Бишкете туруп эле Москванын көчөсүн тили менен шыпырып тазалап коёт. Экинчи түрү, өзүнүн оюн жакшы жеткире албайт бирок, иштин майын чыгарат. Жооп бере албай калса эле болбогон кадрды коюп алыптыр дегенден алыс болушубуз керек»,-деди президент.
Белгилей кетсек, Курултайга өлкөнүн бардык аймактарынан миңден ашуун делегат, ошондой эле чет өлкөлөрдө жашаган мигранттардын жана диний конфессиялардын өкүлдөрү катышууда.
Делегаттар өздөрүнүн шайлоочулары жолдогон сөздөрүн айтып чыгууда, аймактарды жана айылдарды өнүктүрүү, экологияны жакшыртуу, коңшу мамлекеттер менен чек ара маселелерин чечүү, өлкөнүн экономикасын өнүктүрүү, чет жерде жашаган кыргызстандыктардын көйгөйлөрүнө байланышкан жана башка коомдук маанилүү маселелерди көтөрүп жатышат.
