Жалал-Абад облусунда системалуу түрдө пара талап кылган Саламаттык сактоо министрлигинин бөлүм башчысы кармалды. Бул тууралуу УКМК билдирет.
Базар-Коргон районунун Жалпы дарыгерлик практика борборунда системалуу түрдө акча чогултуу боюнча тургундардан бир нече жолу даттануулар жана кайрылуулар келип түшкөн.
Буга байланыштуу «пара алуу» беренесинин негизинде кылмыш иши козголуп, Базар-Коргон райондук жалпы дарыгерлик практика борборунун бөлүм башчысы кармалды. Шектүү эмгекке жарамсыздык баракчасын (ооруканалык) бергендиги үчүн, ошондой эле майыптыгынын тобун аныктоодо медициналык-социалдык эксперттик комиссиянын оң корутундусун тездеткендиги үчүн жарандардан системалуу түрдө опузалап акча алган.
Анын мыйзамсыз аракеттери сот органдарынын уруксаты менен жашыруун камерага жаздырылган. Учурда тергөө-ыкчам иш-чаралары жүргүзүлүүдө.
