Мамлекеттик салык кызматы салык мыйзамдарындагы өзгөртүүлөргө ылайык, кыймылсыз мүлккө автоматташтырылган эсептөөнү киргизүүдө. Бул тууралуу Мамлекеттик салык кызматынан билдиришти.
Салык кодексине киргизилген өзгөртүүлөргө ылайык мүлк салыгын эсептөө жана төлөө кыймылсыз мүлктүн же жер тилкесинин жайгашкан жери боюнча салык органы тарабынан ишке ашырылат.
Бул ченемдерди ишке ашыруу максатында Салык кызматы мүлк салыгын эсептөөнүн автоматташтырылган системасын ыңгайлаштыруу боюнча комплекстүү техникалык иштерди жүргүзүүдө.
Бул мүлк салыгын эсептөө жол-жобосун жөнөкөйлөтүп, салык төлөөчүлөргө административдик жүктү азайтат жана төлөмдөрдүн тактыгын жогорулатат.
Салык кызматы 2026-жылдын салык милдеттенмелерин туура түзүү үчүн бардык жеке жана юридикалык жактарды укук белгилөөчү документтердеги маалыматтарды Кыргыз Республикасынын Министрлер Кабинетине караштуу жер ресурстары, Кадастр, геодезия жана картография боюнча мамлекеттик агенттиктин («Кадастр» мамлекеттик мекемеси) маалыматтары менен алдын ала салыштырып текшерүүгө чакырат.
Төмөнкү маалыматтардын тууралыгын текшерүү зарыл:
— Мүлк салыгынын ээсинин жеке идентификациялык номери;
— Юридикалык жактын аталышы, фамилиясы, аты, атасынын аты;
— Кыймылсыз мүлк объекттеринин жана жер тилкелеринин аянтын;
— Объекттерди дайындоо;
— Ээлик үлүштөрү;
— Каттоо датасын жана укук белгилөөчү документтерде чагылдырылган башка параметрлерди.
Маалыматтарды өз убагында салыштыруу мүлк салыгын автоматташтырылган режимде туура эсептөөнү камсыз кылат жана мүмкүн болгон айырмачылыктардын алдын алат.
