Нарын шаарынын мэри болуп Самарбек Болотбеков шайланды. Бул тууралуу аймактык кабарчы билдирди.
Маалыматка ылайык, бүгүн, Нарын шаардык кеңешинин кезектеги III сессиясынын жүрүшүндө Нарын шаарынын мэрин шайлоо болуп өттү. Анда эки талапкер ат салышты. Алар, Нарын шаардык муниципалдык «Таза-Нарын» ишканасынын директору Суранов Алмаз Суранович, Бишкек шаарынын Свердлов районунун мурдагы акими Болотбеков Самарбек Болотбекович.
Нарын шаардык кеңешинин көпчүлүк «Ынтымак» коалициясын түзгөн «Улуу Кыргызстан», «Ордо», «Патриот Ынтымагы», «Ыйман нуру» партиялары Самарбек Болотбековдун талапкерлигин көрсөтүшкөн. Азчылыкта калган «Бийлик элге», «Республика», «Өнүгүү-Прогресс» саясий партиялары Алмаз Сурановдун талапкерлигин көрсөтүшкөн. Шайлоодо Самарбек Болотбековго 19 добуш, ал эми Алмаз Сурановго 12 депутат добуш берди.
Эскерте кетсек, буга чейин Нарын шаарынын мэри болуп Нурбек Молдокадыров иштеп келген. Нарын шаардык кеңешинде 31 депутат бар.
