Кызыл-Кыяда окуучуну сабаган “Сапат” лицейинин мугалими андан башка дагы 7 окуучуга кол көтөргөн. Бул тууралуу билим берүү жана илим министринин орун басары Муратбек Касымалиев Жогорку Кеңештин Социалдык саясат боюнча комитетинин 29-январдагы жыйынында билдирди.
Ал лицейдеги окуяны иликтөө үчүн министрликте түзүлгөн комиссиянын ишинин жыйынтыгы чыкканын кошумчалады.
“Окуучулардын арасында психологиялык тест жүргүздүк. Анын жыйынтыгында жеке эле бир бала эмес, дагы жети окуучу ошол мугалимден жабыркаган экен”, — деди ал.
25-январда Баткен облустук милициясы аталган лицейде окуучуларга күч колдонгон деп шек саналган 35 жаштагы мугалим кармалып, ага Кылмыш-Жаза кодексинин “Бейбаштык” беренеси менен айып тагылган.
Жыйында Ички иштер министринин орун басары Октябрь Урмамбетов шектүү үй камагына чыгарылып, иш тергелип жатканын айтты.
Эске салсак, окуучуга кол көтөргөн мугалим менен тарбия иштери боюнча директорунун орун басары жумуштан алынган.
