Валентина Шевченко Кыргызстанда кеминде эки жума болууну пландоодо. Бул тууралуу ал Бишкектеги маалымат жыйынында билдирди.
«Менин соңку сапарым мен каалагандай узакка созулган жок. Эми колдон келишинче Кыргызстанда калууну пландап жатам. Акыркы эки жылда Бишкек абдан өзгөрдү. Көптөгөн жаңы имараттар курулду. Борбор калаанын мурдагыдай эле таанымал эски шаар бойдон калганы кубандырат», — деди ал.
Эске салсак, UFC чемпиону Валентина Шевченко Бишкекке 21-ноябрда учуп келген. “Манас” эл аралык аэропортунан аны күйөрмандар тосуп алышты. Ал 2019-жылдан бери келе элек болчу.
