“Сосновка» жана «Кара-Көл» көзөмөл-өткөрүү пункттарында QR-код менен накталай эмес түрдө төлөм системасы аркылуу 2025-жылы жалпы 300 млн 266 миң 484 сом жыйым чогулду.
Транспорт жана коммуникациялар министрлигинен билдиришкендей, бул былтыркы жылдын ушул мезгилине салыштырмалуу 35,48 пайызга көп.
Буга чейин калкка кызмат көрсөтүүнүн сапатын жогорулатуу, адам факторун жокко чыгаруу, коррупциялык көрүнүштөрдү болтурбоо максатында көзөмөл-өткөрүү пункттарын накталай эмес төлөмгө өткөрүү тапшырмасы коюлган. Натыйжада, айдоочулар үчүн накталай төлөм жүргүзүү токтотулган.
Учурда жарандар заманбап жана ыңгайлуу болгон QR-код аркылуу терминалдар аркылуу же электрондук капчыктар аркылуу төлөм жүргүзүп жатышат.
Мындан тышкары, «Сосновка» жана «Кара-Көл» контролдоо пунктарында транспорт каражаттарынын тыгынын алдын алуу максатында жол тилкелери кеңейтилди.
