“Ак-Башат” айыл аймагынын мурдагы жетекчиси жана подряддык компаниянын директору кызмат абалынан кыянаттык менен пайдаланган деп кармалды. Бул тууралуу УКМК билдирет.
Тактап айтканда, Чүй облусунун Жайыл районунун Ак-Башат айыл аймагынын мурдагы башчысы К.У.Т., подряддык компаниянын директору А.у.Т. менен биргеликте ирригациялык каналдарды орнотуу боюнча тендерди өткөрүүдө республикалык бюджетке өзгөчө ири өлчөмдө зыян келтирген.
Эсеп палатасынын Бишкек шаары, Чүй жана Талас облустары боюнча аймактык бөлүмү тарабынан жүргүзүлгөн текшерүүнүн жыйынтыгында келтирилген зыяндын көлөмү 17 миллион сомдон ашык сумманы түзгөн.
Бул адамдар Бишкек шаарынын Октябрь райондук сотунун чечими менен Юстиция министрлигинин Жаза аткаруу кызматынын №21 мекемесине жайгаштырылды.
Учурда башка кызмат адамдарынын катыштыгы бар экендигин аныктоо боюнча ыкчам-иликтөө иш-чаралары улантылууда.
