Талас шаарында мамлекеттик ипотекалык программанын алкагында салынып жаткан 319 батирлүү көп кабаттуу үйлөрдүн курулушу толугу менен аяктады. Бул тууралуу шаардык мэриядан билдиришти.
Маалыматка ылайык, жаңы батирлердин ачкычтары үй ээлерине 24-июлда тапшырылат.
Турак жай комплекси Талас шаарындагы Тынчтык конушунда жайгашып, жалпы аянты 2 гектарды түзөт. Курулуш иштери 2024-жылдын сентябрь айында башталган.
Комплекс 11 блоктон турат. Анда жалпы 319 батир каралган. Алардын ичинен 55 батир үч бөлмөлүү, 143 батир эки бөлмөлүү, ал эми 121 батир бир бөлмөлүү.
