Талас облусунда коррупция фактысы боюнча Аманбаев айылдык кеңешинин спикери жана атайын администратору кармалды. Бул тууралуу УКМК билдирет.
Атайын администратор Э.А.М. тарабынан «Күркүрөө» дыйкан чарбасынын банкроттоо жол-жобосун жүзөгө ашыруу шылтоосу менен 46 жер тилкесине укук белгилөөчү документтер, анын ичинде Аманбаев айылдык кеңешинин спикери Н.У.М.га жана анын жакын адамдарына 12 жер тилкеси мыйзамсыз берилген.
Көрсөтүлгөн жер тилкелери иш жүзүндө «Күркүрөө» дыйкан чарбасынын балансында болгон эмес, ал эми айрымдары токой тилкелери болгон, аларды тескөөнүн өзгөчө тартиби белгиленген.
26-февралда аталган адамдар кармалып, Талас ШИИБдин убактылуу кармоочу жайына киргизилди. Учурда тергөө иш-чаралары улантылууда.
