Танзания тарыхында биринчи жолу аял киши президент болду. Бул тууралуу чет элдик маалымат булактары жазып чыгышты.
Маалыматка ылайык, мурдагы өлкө башчысы Джон Магуфули 2015-жылдан бери өлкөнү башкарып келген, 61 жашында көз жумгандан кийин, анын ордуна вице-президент Самия Сулуху Хасан келди. Ал кечээ, 19-мартта ант берди.
«Мен, Самия Сулуху Хасан, чынчыл болууга, Танзаниянын Конституциясын сактоого жана коргоого убада берем», — деди Хасан ант берүү аземинде.
Расмий маалыматтарга караганда, Магуфулинин өлүмүнө жүрөк оорусу себеп болгон. Бирок Financial Times гезити билдиргендей, Танзаниянын президенти коронавируска чалдыккан жана февралдын аягынан бери эл алдына чыга элек болчу. Алгач Конгодо, андан кийин Индияда дарыланган.
Магуфули Африкадагы коронавируска күмөн санаган лидерлердин бири болгон. Ал ооруну дарылоонун илимий ыкмаларын четке каккан.