Бүгүн, 1-августта УКМК төрагасы Камчыбек Ташиев 17-июлдан 20-июлга чейин Казакстан Республикасынын Алматы шаарында болуп өткөн «OCTAGON 60» эрежесиз уруш боюнча турнирге катышкан КР УКМКнын «А» атайын багыттагы кызматынын кызматкери Б.у.И. менен жолугушуу өткөрдү.
Башкы титулдук урушта (ар бири 5 мүнөттөн 5 раунддук беттеш) «А» атайын багыттагы кызматынын кызматкери Б.у.И. 1-раундда ирандык атаандашы Акбар Бекхяпурду нокаут менен жеңип, оор салмактагы чемпиондук курун коргогон.
УКМК төрагасы Ташиев мушкерди титулун коргошу менен куттуктап, бекем ден-соолук жана спорттук карьерасында ийгиликтерди каалады. Ошондой эле, төрага кызматкерди акчалай сыйлык менен сыйлады.
