Тажик жарандары тарабынан барымтага алынган Лейлек районунда Интернационал айылынын башчысы Мырзабек Жумабаев Тажикстандын аймагында экендиги аныкталды жана барымтадан бошотула элек. Бул тууралуу Баткен облустук милициясынын маалымат катчысы Дамира Юсупова билдирди.
Маалыматка ылайык, учурда Ички иштер министрлиги Тажикстандын күч структуралары менен Мырзабек Жумабаевди барымтадан бошотуу боюнча сүйлөшүүлөрдү жүргүзүп жатат.
Эске салсак, буга чейин кыргыз жарандарына тиешелүү «Жилой дом» участкасындагы турак жайларды тажик аскерлери ээлеп алган. Участкага жакын аймакта эки кыргызстандык каза болгондугун тактоо максатында Мырзабек Жумабаев барган учурда тажик жарандары аны барымтага алган.
