Токмок шаарында алдамчылыкка шектелип, абакта жазасын өтөп жаткан жаран аныкталды. Бул тууралуу Чүй ОИИБдин басма сөз кызматы билдирди.
Маалыматка ылайык, Токмок шаарынын ички иштер бөлүмүнө 1984-жылы туулган Б.К. арыз менен кайрылган. Анда, март айында анын атынан кимдир бирөө 10 миң сом өлчөмүндөгү насыя алгандыгын билдирген.
Жүргүзүлгөн ыкчам-издөө иштеринин жүрүшүндө алдамчылыкка шектелген жарандын өздүгү такталып, ал абакта жаткан 1999-жылы туулган Б.У., аттуу жаран экендиги аныкталган.
Учурда шектүү тергөө кызматына жеткирилип, сотко чейинки териштирүү иштери уланууда.
