Кечээ, 20-октябрда Токмоктогу жеке менчик аэродромдо «Бристоль» үлгүсүндөгү эки орундуу учак кулаган. Кырсык Токмоктун жака белиндеги Кызыл-Аскер айылындагы айыл чарба авиациясынын аэродромунда авиациялык коллеждин курсанттары машыгып жаткан учурда болгон. Алар ооруканага жеткирилген.
«Эки жаран тең Улуттук госпиталда жатышат. Биринин абалы оор, жанадандыруу бөлүмүндө жатат, экинчисинин абалы орточо оор деп бааланууда. Бейтаптар ар кандай жаракаттарды алышкан. Оор абалда жаткан бейтаптын буту сынып, экөө тең күйүк алган»,- деп билдирди жабыркагандардын абалы тууралуу Саламаттыкты сактоо министрлиги.